Los-Anceles dairəsində yanğınlar davam edir. Bu müddətdə evlərin orta qiyməti 3 milyon dollar olan Pasifik-Poliseyds rayonunda bir çox məşhurların mülklərinə zərər dəyib.
İlkin hesablamalara görə, Hollivud ulduzlarının azı 170 milyon dollardan çox dəyərində evləri yanıb.
Kendi Spellinq - 24 milyon dollar
ABŞ-li yazıçı, "Kendilend hekayələri" və "Nəhayət, Kendi" bestsellerlərinin müəllifi, brodvey müzikllərinin prodüseri Kendi Spellinq Malibuda La Kosta çimərliyində 24 milyon dollar dəyərində evini itirib. Bir neçə il əvvəl satış elanında bu evi belə təsvir edilib:
"Sakit okeana baxan ikimərtəbəli mülk, çimərliyə aparan geniş terras və pilləkənlər. Şəxsi vanna otaqları olan yeddi yataq otağı, panoram pəncərəli yemək otağı. Multimedia otağında buxarı, bar piştaxtası, həmçinin peşəkar proyeksiya avadanlığı və media faylların saxlanması üçün yer var. İki kabinet, yan həyət, iki avtomobil üçün qaraj, həmçinin açıq havada yemək və əyləncə üçün çoxlu sahələr".
Ben Afflek - 20 milyon dollar
Ben Afflekin Cennifer Lopesdən ayrıldıqdan sonra (cəmi beş ay əvvəl) aldığı ev tamamilə yanıb. Geniş malikanədə yeddi yataq otağı, doqquz hamam otağı, idman zalı, SPA salonu, şəxsi kinoteatr və hətta iqlim nəzarətli şərab zirzəmisi var idi. Evin yanındakı ərazidə hovuz, yay mətbəxi və kiçik bağça da məhv olub.
Mel Gibson - 14.5 milyon dollar
Aktyor Texasdan, podkast yazılışından sonra Los-Ancelesdəki evinə qayıtdığını və evin orada olmadığını aşkar etdiyini deyir. Gibson bu malikanəni 2008-ci ildə aktyor Devid Duxovnıdan alıb. Malikanə orta əsr üslubunda tikilmişdi - qüllələr, spiral pilləkənlər, xam daşdan hörülmüş divarlar. İnteryer orta əsr üslubunda pərdələr və divar xalçaları ilə bəzədilmişdi. Tavanlarda massiv palıd tirləri olub. Burada "Dəyirmi masa cəngavərləri" dövrünə uyğun dizayn edilmiş buxarı zalı da var idi. Bundan əlavə, malikanədə 2 hektar landşaft parkı olub.
Mariya Şrayver - 10 milyon dollar
Hollivud ulduzu Arnold Şvartseneggerin keçmiş həyat yoldaşı bütün küçənin yanmış qalıqlarının videosunu paylaşıb. Onun evi ilk yananlardan biri olub. Şrayver bu malikanəni Şvartseneggerdən boşanandan sonra 10 milyon dollara almışdı. Malikanədə səkkiz yataq otağı və yeddi hamam otağı, həmçinin idman zalı və şərab zirzəmisi olub. Bundan başqa üç avtomobil yerləşən qaraj da maşınlarla birlikdə yanıb.
Billi Kristal - 9.2 milyon dollar
Hollivud ulduzu Billi Kristal və həyat yoldaşı Cenis 45 il yaşadıqları evlərini itiriblər. 1936-cı ildə tikilmiş malikanədə dörd yataq otağı və altı hamam otağı olub.
Riki Leyk - 8.8 milyon dollar
Məşhur aktrisa Riki Leyk Malibudakı "Xəyallarının evinin" yanğın zamanı yandığını yazıb. O bu bağ-bağatlı evi aktrisa Kortni Koks və onun ozamankı həyat yoldaşı Devid Arkettdən 8,8 milyon dollara almışdı. Müstəmləkə üslubunda tikilən evdə beş yataq otağı, unikal dizayner işıqlandırması, hovuz və SPA mərkəzi olub. Bundan əlavə, evin ətrafında palma və ayıdöşəyi bitkiləri olan bağ var idi.
2023-cü ildə vəfat edən Metyu Perrinin keçmiş evi - 8.5 milyon dollar
"Dostlar" serialının ulduzu Metyu Perrinin faciəli şəkildə vəfat etdiyi ev cəmi üç ay əvvəl developer Anita Verma-Lallian tərəfindən 8.5 milyon dollara alınmışdı. Dörd yataq otağı və beş vanna otağı olan malikanə yanğına məruz qalıb və daxildən yanıb, lakin yanğınsöndürən briqadaların səyləri nəticəsində söndürülüb. Bərpa olunub-olunmayacağını demək hələ tezdir, lakin ev sahibi artıq bildirib ki, evi söküb yenisini tikmək daha asandır.
Paris Hilton - 8.4 milyon dollar
Paris Hiltonun Malibudakı çimərlik evi məhv olub. Ulduz bunu xəbərləri canlı izləyərkən görüb. 1950-ci illərdə tikilmiş ev 2021-ci ildə 8.4 milyon dollardan çox qiymətə alınmışdı. Evdə üç yataq otağı və üç hamam otağı, sütunlu və nəhəng çilçırağı olan buxarı otağı, həmçinin okeana baxan eyvanlar olub.
Maylz Teller - 7.5 milyon dollar
"Top Gun: Maverick" filminin ulduzu Maylz Teller 2023-cü ilin aprelində öz evini 7.5 milyon dollara alıb. 600 kvadratmetr sahəsi olan evdə beş yataq otağı və yeddi hamam otağı var idi. Evdə hündür tavanlar, buxarılı geniş qonaq otağı, ən yüksək sinif məişət texnikası ilə təchiz edilmiş müasir mətbəx, idman zalı, kinoteatr və bir neçə ailə otağı olub. Ev tamamilə məhv olub. Aktyorun həyat yoldaşı Kelli Teller sosial şəbəkələrdə son fotonu paylaşıb - evin üzərindən qara tüstü qalxır. Bundan sonra o, yanğınsöndürənlər tərəfindən təxliyə edilib.
Leyton Mister və Adam Broudi - 6.5 milyon dollar
Hollivud ulduzu Leyton Mister və həyat yoldaşı, aktyor Adam Broudinin 2019-cu ildə 6.5 milyon dollara aldığı evi yanıb. Onlar beş yataq otağı və altı vanna otağı olan 560 kvadratmetrlik üçmərtəbəli malikanədə yaşayırdılar. Hazırda cütlük iki azyaşlı uşağı ilə birlikdə Nyu-Yorka köçüb.
Entoni Hopkins - 6 milyon dollar
87 yaşlı əfsanəvi aktyor Entoni Hopkins 2021-ci ildə dörd yataq otağı və beş hamam otağı olan evi 6 milyon dollara almışdı. İndi ondan yalnız kül qalıb.
Cene Ayko - 5.6 milyon dollar
36 yaşlı R&B müğənnisi Cene Ayko Los-Ancelesdəki yanğın zamanı evinin bütün əşyaları ilə birlikdə yandığını bildirib. Cene evi 2023-cü ilin iyulunda 5.6 milyon dollara alıb. 1980-ci illərdə tikilən 436 kvadratmetrlik ikimərtəbəli evdə, həmçinin beş yataq otağı və beş hamam otağı olub.
Kobi Smolders - 5.6 milyon dollar
42 yaşlı ulduz Kobi Smolders də yanğın zamanı evini itirib. O və həyat yoldaşı Taran Killam evi 2017-ci ildə 5.6 milyon dollara almış və təmirinə bir ildən çox vaxt sərf etmişdilər. Evdə beş yataq otağı və altı hamam otağı olub.
Anna Feris - 5 milyon dollar
"Scary Movie" serialının 48 yaşlı ulduzu Anna Feris 2019-cu ildə 5 milyon dollara aldığı 370 kvadratmetrlik malikanəsini itirib.
Rozi O'Donnell - 4.9 milyon dollar
ABŞ-li televiziya aparıcısı və komediya aktyoru Rozi O'Donnell Malibudakı Sakit okean sahili boyunca dağılmış binaları göstərən video paylaşıb və evinin məhv edildiyini yazıb. 381 kvadratmetrlik evdə beş yataq otağı, altı hamam otağı, divara quraşdırılmış buxarı olan geniş qonaq otağı, şərab dolabı olan yemək otağı və müasir məişət texnikası ilə təchiz edilmiş mətbəx olub. Mətbəxdən böyük kitab rəfləri və panoram pəncərələri olan başqa bir qonaq otağına keçmək olardı. İkinci mərtəbədəki ev sahibəsinin sevimli yataq otağında da buxarı və yanında iki qarderob olub.
Con Qudman - 4.6 milyon dollar
Аktyor Con Qodmanın evi də külə çevrilib. O, evi 2008-ci ildə 4.6 milyon dollara alıb. Ümumi sahəsi isə 500 kvadratmetr olan evdə beş yataq otağı və beş hamam otağı olub.
Mendi Mur - 4 milyon dollar
Müğənni və aktrisa Mendi Mur da Los-Ancelesdəki malikanəsini itirənlər arasındadır. O, keçmiş həyat yoldaşı ilə boşanmadan sonra evi satmaq istəyib və bir müddət əvvəl 4 milyon dollara satışa çıxarıb, lakin gecikib - yanğın hovuz və tennis kortu olan ikimərtəbəli evi məhv edib.
Yucin Levi - 3.9 milyon dollar
"American Pie" komediyasının ulduzu Yucin Levinin evi də təbii fəlakətlə məhv olub. Levi öz əmlakını 2006-cı ildə 3.9 milyon dollara almışdı. 190 kvadratmetr olan ikimərtəbəli malikanədə üç yataq otağı və üç hamam otağı olub.
Haydi Monteq və Spenser Pratt - 3.8 milyon dollar
Məşhur "Hollywood Hills" realiti şousunun iştirakçısı Haydi Monteq və həyat yoldaşı Spenser Pratt 3.8 milyon dollar dəyərində olan evlərinin məhv olduğunu bildiriblər.
Bozoma Sent-Con - 3.3 milyon dollar
"Netflix"in keçmiş marketinq direktoru və aktyor Malibudakı evinin yanğın zamanı yandığını yazıb. Bu, 1932-ci ildə tikilmiş, açıq planlaşdırma və bol təbii işığa malik olan müstəmləkə üslubunda bir ev olub. Malikanədə dörd yataq otağı və dörd hamam otağı var idi.
Ceyms Vuds - 2.65 milyon dollar
Aktyor Ceyms Vuds öz rayonunun alovla əhatə olunmuş video görüntülərini paylaşıb. O, 2.65 milyon dollar dəyərində olan evinin məhv olmasını onlayn izlədiyini söyləyib: tüstü detektorları növbə ilə onun smartfonuna siqnallar göndərməyə başlayıb, sonra isə həmişəlik susub.
Maylo Ventimilya - 2 milyon dollar
Ulduz Maylo Ventimilya da evinin yanmasını təhlükəsizlik kameraları vasitəsilə izləyib. 160 kvadratmetrdən çox ümumi sahəsi olan evdə üç yataq otağı və iki hamam otağı olub. Villa 1962-ci ildə tikilib. Villanın daxili həyəti də tamamilə yanıb.
Kemeron Metison - 1.67 milyon dollar
Aktyor Kemeron Metisonun evi də yanğında məhv olub. Metison və keçmiş həyat yoldaşı Vanessa Arevalo iki uşaqları ilə bu evdə yaşayıblar. Onlar bu evi 2012-ci ildə 1.67 milyon dollara almışdılar.
Deniz Krosbi - 1.1 milyon dollar
"The Walking Dead" serialının aktrisası Deniz Krosbi sosial mediada evinin "külə döndüyünü" göstərən şəkil paylaşıb.
Evləri məhv olan bəzi məşhurların mülklərinin dəyəri açıqlanmayıb. Bunlar Hollivud ulduzları Heyli Coel Osment, Brayan Qrinberq, Ceff Brices, Harvi Gillen, Melissa Kler İqan, bəstəkar, musiqiçi, "Grammy" mükafatı laureatı Dayan Uorren, Beyonsenin anası, sahibkar Tina Noulz və başqalarıdır.
Ekspertlərin sözlərinə görə, bu təbii fəlakət ABŞ tarixində ən bahalı hadisələrdən biri ola bilər: analitiklər sığorta itkilərinin 8 milyard dollardan çox olacağını proqnozlaşdırırlar.
