"Trans-Adriatik Qaz Kəmərinin (TAP) əlavə genişləndirilməsi ilə bağlı yekun qərarın 2026-cı ilin yanvar ayında qəbul edilməsi planlaşdırılır".
Oxu.Az "Report"a istinadən xəbər verir ki, bu barədə Azərbaycan Dövlət Neft Şirkətinin (SOCAR) vitse-prezidenti Elşad Nəsirov Bakıda keçirilən Cənub Qaz Dəhlizi (SGC) Məşvərət Şurası çərçivəsində nazirlərin 11-ci və Yaşıl Enerji Məşvərət Şurası çərçivəsində nazirlərin 3-cü iclaslarında bildirib.
Onun sözlərinə görə, genişləndirmənin birinci mərhələsi çərçivəsində TAP-ın ötürmə qabiliyyəti ildə 1.2 milyard kubmetr artırılacaq, kommersiya istismarına isə 2026-cı ilin dekabr ayında başlanılması nəzərdə tutulur.
"Həmçinin 2023-cü ildə aparılmış bazar sınaqlarının nəticələri əsasında TAP-ın daha da genişləndirilməsi mümkünlüyü nəzərdən keçirilir. Tenderdə iştirak üçün müraciətlərin qəbulu 2025-ci ilin dekabr ayında başa çatacaq, 2026-cı ilin yanvar ayında isə yekun investisiya qərarının qəbul edilməsi planlaşdırılır", - deyə E.Nəsirov qeyd edib.
Azərbaycan Avropaya qaz ixracına 2020-ci il dekabrın 31-də başlayıb. Azərbaycan və Avropa İttifaqı arasında əldə olunmuş razılaşmaya əsasən, 2027-ci ilə qədər Azərbaycan qazının tədarük həcmi ildə minimum 20 milyard kubmetrə çatmalıdır. Qaz kəmərinin genişləndirilməsinin birinci mərhələsi çərçivəsində İtaliya bir milyard kubmetr, Albaniya isə 200 milyon kubmetr Azərbaycan qazı alacaq.
