Bakıda Cənub Qaz Dəhlizi Məşvərət Şurası nazirlərin 11-ci iclası və Yaşıl Enerji Məşvərət Şurası nazirlərin 3-cü iclası çərçivəsində üç günəş enerjisi layihəsi üzrə müqavilələr imzalanıb.
Oxu.Az xəbər verir ki, Azərbaycan Respublikası Hökuməti və "Enerso Cəbrayıl" MMC arasında Azərbaycan Respublikasında 50 MVt gücündə "Üfüq" günəş elektrik stansiyası layihəsi ilə bağlı investisiya müqaviləsini energetika naziri Pərviz Şahbazov və şirkətin direktoru Eldar Məmmədzadə imzalayıblar.
Azərbaycan Respublikası Hökuməti və "Clean Energy Jabrayil" MMC arasında Azərbaycan Respublikasında 50 MVt gücündə "Şəms" günəş elektrik stansiyası layihəsi üzrə investisiya müqaviləsini energetika naziri Pərviz Şahbazov və şirkətin direktoru Xəyalə Nağıyeva imzalayıblar.
Azərbaycan Respublikasının Energetika Nazirliyi və "Nobel Energy Limited" şirkəti arasında Naxçıvan şəhərində 30 MVt gücündə günəş elektrik stansiyasının qiymətləndirilməsi, inkişafı və həyata keçirilməsi ilə bağlı icra müqaviləsi isə energetika nazirinin müavini Elnur Soltanov və "Nobel Energy Limited" şirkətinin baş direktoru Vüqar Səmədli tərəfindən imzalanıb.
Yaşıl enerji zonalarının inkişafı baxımından mühüm əhəmiyyət kəsb edən layihələrin reallaşması nəticəsində ümumilikdə illik 268 milyon kVt-saat elektrik enerjisi istehsalı gözlənilir ki, bu da 59 milyon kubmetr qaza qənaət edilməsinə və 128 milyon ton karbon emissiyasının azaldılmasına imkan yaradacaq.
