“NATO-nun Finlandiyada Rusiya ilə sərhəd yaxınlığında aprelin 26-dan etibarən keçiriləcək təlimləri təxribat xarakterlidir”.
Bunu Rusiya Xarici İşlər Nazirliyinin rəsmi nümayəndəsi Mariya Zaxarova deyib.
Onun sözlərinə görə, təlimlər Şimali Atlantika Alyansının (NATO) gücünü nümayiş etdirmək və Rusiyaya hərbi təzyiq göstərmək məqsədi daşıyır.
“NATO nümayəndələri, öz niyyətlərinə haqq qazandırmaq üçün Rusiyadan gələn xəyali təhlükə ətrafında (o cümlədən Rusiyanın guya təşkilata üzv olan ölkələrə hücum planları haqqında məlumat yaymaqla) müzakirələri xüsusi olaraq intensivləşdirirlər”, - deyə o bildirib.
Zaxarova qeyd edib ki, Finlandiya ərazisində təlimlərin keçirilməsi Rusiyaya qarşı hibrid müharibənin tərkib hissəsidir və Helsinki bu avantüranın tamhüquqlu iştirakçısına çevrilməyə çalışır.
Eyni zamanda, o əlavə edib ki, alyansın Rusiya ilə sərhədlər yaxınlığında bu cür hərəkətləri yalnız mümkün hərbi insidentlərin riskini artırır.
Rusiya Xarici İşlər Nazirliyinin rəsmi nümayəndəsi vurğulayıb ki, Rusiya kollektiv Qərbin təcavüzkar hərəkətlərini izləməyə davam edir.
Mənbə: RIA Novosti
