Dünyada orta ömür uzunluğu 1900-cü ildən bəri iki dəfədən çox artıb. Bu, həyat şəraitinin yaxşılaşması, tibbi nailiyyətlər və uşaq ölümü səviyyəsinin azalması sayəsində mümkün olub.
Kriminal.Az-ın məlumatına görə, bu məlumat BMT-nin Əhali Fondunun (UN WPP) hesabatında dərc edilib.
Məlumata görə, XX əsrin əvvəllərində orta ömür uzunluğu bugünkü ilə müqayisədə xeyli aşağı idi və cəmi 32 il təşkil edirdi. 2023-cü ildə bu göstərici 73 ilə qədər artıb, bu da keçmiş dövrlə müqayisədə 41 il çoxdur. Bu artım həyat səviyyəsinin yaxşılaşması, o cümlədən daha yaxşı qidalanma və səhiyyə sisteminin inkişafı nəticəsində əldə edilib.
Xüsusilə uşaq ölümünün azalması əhəmiyyətli olub və ümumi ömür uzunluğu statistikasına böyük təsir göstərib. Lakin bu, yeganə səbəb deyil, çünki bütün yaş qruplarında ömür uzunluğu artıb. Antibiotiklərin və peyvəndlərin meydana çıxması kimi tibbi nailiyyətlər, həmçinin sanitariya şəraitinin yaxşılaşması bu prosesdə mühüm rol oynayıb.
