Güclü liderlik keyfiyyətləri, strateji baxışı və təsirli ünsiyyət bacarıqları - uğurlu bir baş direktor üçün ən çox vurğulanan xüsusiyyətlər bunlardır. Lakin alimlər son araşdırmaları ilə bu stereotiplərin fövqündə daha maraqlı və gözlənilməz bir faktora diqqət çəkirlər: solaxaylıq.
Qaynarinfo xəbər verir ki, texnologiya və biznes dünyasının nəhəng simaları - Stiv Cobs, Bill Qeyts və Mark Zukerberq - uzun illərdir bu sahələrdəki uğurlarının səbəbi ilə insanları maraqlandırır. Donald G. Kostello Biznes Məktəbinin mütəxəssisləri tərəfindən aparılan yeni araşdırmaya əsasən, bu uğurların arxasında sadə, lakin çox zaman nəzərə alınmayan fiziki bir xüsusiyyət - sol əl üstünlüyü - dayanır.
Tədqiqat qrupu bu iddianı sübut etmək üçün 472 şirkətdən minlərlə baş direktorun məlumatlarını təhlil edib. Nəticələr göstərib ki, solaxay baş direktorların rəhbərlik etdiyi şirkətlər daha çox innovasiya həyata keçirir, daha unikal patentlər təqdim edir və ümumilikdə, maliyyə baxımından daha yüksək gəlirlər əldə edirlər.
Araşdırmanın həmmüəlliflərindən biri olan professor Lonq Çen bildirir:
"Bir baş direktorun uğuruna təsir edən amillər arasında ailə mühiti, genetik meyillər, təhsil və karyera təcrübələri mühüm rol oynayır. Amma bu uğur, bütün bu amillərin və doğuşdan gələn xüsusiyyətlərin mürəkkəb bir sintezinin nəticəsidir."
Bəs solaxaylıq bu cür üstünlükləri necə təmin edə bilər? Elmi araşdırmalar göstərib ki, solaxay insanların beyni sağ əlli insanlara nisbətən fərqli şəkildə təşkil olunmuş ola bilər. Bu da onlara qeyri-adi düşüncə tərzi və problemlərə yaradıcı yanaşma imkanı verir.
2019-cu ildə aparılan bir araşdırma, solaxay şəxslərin ortalama səviyyədən daha yaxşı nitq bacarıqlarına sahib ola biləcəyini göstərmişdi. 2017-ci ildəki digər bir araşdırma isə, reaksiya sürəti tələb edən idman növlərində solaxay idmançıların daha üstün performans göstərdiyini ortaya qoymuşdu.
Yeni tədqiqat solaxaylığın yalnız gündəlik həyat və ya idman bacarıqları ilə deyil, həm də yüksək səviyyəli liderlik və qərarvermə qabiliyyəti ilə əlaqəli ola biləcəyini göstərir. Bu istiqamətdə aparılacaq əlavə araşdırmalar, uğurlu baş direktorların beyin fəaliyyətləri və solaxaylığın potensial üstünlükləri arasındakı mexanizmləri daha aydın ortaya qoya bilər.
