Son günlər şərti sərhəddəki mövqelərimiz Ermənistan silahlı qüvvələri tərəfindən davamlı atəşə məruz qalır və bu, sistemli xarakter daşıyır. Təxribatların intensivliyinin artmasının səbəbi nədir? Sülh müqaviləsinin müzakirə edildiyi vaxtda Ermənistan silahlı qüvvələri mövqelərimizi niyə davamlı atəşə tutur?
Mövzu ilə bağlı Oxu.Az-a danışan Milli Məclisin deputatı Aydın Mirzəzadə bildirib ki, bu, Ermənistanın Azərbaycana siyasi təzyiq cəhdidir:
"Çünki bu cür təxribatlar Ermənistanın Azərbaycanı tələsik sülh müqaviləsinə imza atmaq çağırışından sonra baş verir. Ermənistan köhnə təfəkkürlə belə hesab edir ki, bununla Azərbaycanı konstitusiyasını dəyişmədən, Minsk qrupu buraxılmadan sülh müqaviləsi imzalamağa məcbur edəcək. Sonradan isə həmin öhdəlikləri yerinə yetirməyərək mövqeyini qoruyub saxlaya biləcək. Amma çox böyük səhv edir. Ermənistan hesab etməsin ki, bu cür təxribatlar uzun müddət davam edəcək".
"İrəvan unutmasın ki, Azərbaycan necə ki, öz suverenliyini və ərazi bütövlüyünü bərpa edib, onu qorumağa da layiqdir. Yaxşı olar ki, Ermənistan Azərbaycanın səbri ilə oynamasın, çünki rəsmi Bakı bu təxribatlara hər zaman layiqli cavab vermək iqtidarındadır", - deyə deputat əlavə edib.
Politoloq Zeynal Əmrəliyev isə Oxu.Az-a açıqlamasında bildirib ki, Ermənistan bir tərəfdən özünü beynəlxalq ictimaiyyətə sülh təşəbbüskarı kimi göstərir, digər yandan da atəşkəs rejimini davamlı şəkildə pozur:
"Ermənistanın xarici işlər naziri Ararat Mirzoyan bu günlərdə verdiyi açıqlamasında ölkəsinin sülh gündəliyinə sadiqliyi barədə danışırdı. Eyni gün və ondan əvvəlki gün isə erməni ordusu cəbhədə təxribatlar həyata keçirirdi. Düzdür, rəsmi İrəvan ilk öncə bunu boynuna almasa da, daha sonra baş nazir Nikol Paşinyanın Müdafiə Nazirliyinə atəşkəsi pozmamaları üçün tapşırıq verməsi hər şeyi açıq şəkildə ortaya qoydu".
"Görünür, Ermənistan Hindistan və Fransadan aldığı silahlarla həvəsə gələrək yenidən revanş götürmək istəyir. ABŞ-nin sabiq prezidenti Co Baydenin hakimiyyətinin sonuna yaxın ABŞ ilə strateji əməkdaşlıq müqaviləsi imzalansa da, Donald Tramp hakimiyyətə gəldikdən sonra Ermənistana çox da əhəmiyyət vermir. Paşinyan həm də Trampın diqqətini regiona çəkmək istəyir. Azərbaycan sülh gündəliyinə sadiqdir və qalıcı sülhün əldə edilməsi üçün çalışır. Ancaq bu cür təxribatlar davam edərsə, Azərbaycan ordusu adekvat cavab verəcək. Son beş ildə baş verənlər göstərir ki, bu, Ermənistan üçün heç də yaxşı nəticəyə səbəb olmayacaq", - deyə ekspert əlavə edib.
Mərahim Nəsib
