İDDİAÇI: "Hakimlər Həqiqət Əhmədova və Qumru Əliyeva, məhkəmə icrasçısı Fəxrəddin Şahhüseynov qəbul etdikləri ədalətsiz Qərar və Qətnamə, tərtib etdikləri saxta protokol ilə, birbaşa, dövlət başçısının iş adamlarını hərtərəfli dəstəkləməsi əleyhinə olduqlarını ortaya qoydular!"
Azərbaycan Prezidenti İlham Əliyev cənabları həmişə öz çıxışlarında xüsusi olaraq onu vurğulayıb ki, ölkə biznesinə mane olanlar, birbaşa, dövlətimizə xəyanət edirlər. Məhz buna görə də, iş adamlarının fəaliyyətinə müdaxilə edənlər ciddi cəzalandırılır. Dövlət başçısı qəti şəkildə onu deyib ki, bu, bundan sonra da belə olacaq: "Artıq ictimaiyyət də bunu görür və görəcək. Son vaxtlar qəbul edilmiş qanunlar və sərəncamlar, verilmiş qərarlar da bu məqsədi güdür ki, sahibkarlara heç kim mane olmasın, süni əngəllər aradan götürülsün, onlar maksimum dərəcədə sərbəst, rahat şəraitdə işləsinlər, vəsait qoyub, iş yerləri yaratsınlar. Beləcə, ölkənin biznes mühiti daha da yaxşılaşsın. Çünki hər bir dövlətin yüksək səviyyədə hərtərəfli inkişafında, onun azad biznesinin vəziyyəti və sahibkarlıq mühitinin durumu mühüm əhəmiyyət kəsb edir".
Çox təəssüf ki, möhtərəm Prezidentin çıxışlarındakı bu və bu kimi ciddi xəbərdarlıqlara belə baxmayaraq, pul qoyub, özlərinə iş yerləri yaradanlar, indinin özündə də, maddi maraqlar uğrundakı intriqalar və səs-küylü qalmaqallar çərçivəsində incidilir. Bu isə, sonda, onların iş üçün qoyduqları külli miqdarda maddi vəsaitin havaya sovrulması anlamına gətirib çıxarır. Dəhşət ondadır ki, əvvəllər olduğu kimi, indinin özündə də, belə açıq qanunsuzluqlara daha çox məhkəmələrdə əl atılır və bütün bunlar dövlət rəhbərinin əhalinin güzəranını yaxşılaşdırmaq, ölkədə sahibkarlığı daha da inkişaf etdirmək, yeni iş yerləri açmaq, cəmiyyətdə qarşılıqlı anlaşma və dialoq yaratmaq, vətəndaş məmnunluğunu hər sahədə təmin etmək sahəsində apardığı böyük işlər fonunda baş verir. Çox təəssüf ki, belə bir şəraitdə bir çox vəzifə sahibləri, hətta ədalət carçıları ictimai və dövlət mənafeyini deyil, şəxsi maraqlarını hər şeydən üstün tuturlar. Bu isə, getdikcə artan haqlı ictimai narazılığın başlıca səbəbinə çevrilir.
Elə, araz.az-ın bu yazısında barəsində danışacağımız xanım iş adamı Tahirə Mirzəyeva da, bir müddətdir ki, belə bir təhlükənin məngənəsindədir və bu çətinlikdən necə çıxacağına ümidi qalmayıb. Çünki əsas günahkarlardan başqa, haqq-ədalət müdafiəçisi olan məhkəmə hakimləri belə, onun özü ilə bərabər, yaratdığı iş yerinin də başlarına oyunlar açmaqdan, zərrə qədər də olsa, çəkinmək istəməyiblər. Baxmayaraq ki, külli miqdarda pulunu xərcləyərək, icarəyə götürdüyü obyektdə özünə hər bir şəraitə malik çörəkbişirmə sexi quran bu kiçik sahibkarın başına oyun açıb, olmazın müsibət gətirənlər, xeyli müddətdir onun biznesinə daha ciddi formada tənəzzül dövrü yaşadırlar. Hərtərəfli ziyana düsən iş adamı isə, nə edəcəyini bilmir. Çünki başına gətirilənlərlə bağlı və hərtərəfli kömək üçün aidiyyatı digər dövlət qurumları rəhbərlərinin adlarına yazdığı şikayət xarakterli çoxsaylı müraciətləri də, indiyədək cavabsız qalaraq, yaxşı bir nəticə verməyib. Bu biganəliyin və saymamazlığın ən pis nəticəsi isə odur ki, adını yuxarılarla bağlayan, istədiyini etməkdən çəkinməyən əsas günahkarın -- icarədarın, eləcə də ona yaxın olanların xətrlərinə dəyən tapılmır ki, tapılmır.
Yeri gəlmişkən, onu da qeyd edək ki, hakimlərin işə ədalətli yanaşmadığını görən və ümidi hər yerdən kəsilən iş adamı,
istəyinin tezliklə reallaşması ümidiylə, sonda, son ümidlərinə -- ölkə başçısına, Birinci vitse-prezidentə və Məhkəmə-Hüquq Şurası sədrinə, eləcə də ölkənin media vasitələrinin rəhbərlərinə üz tutaraq, əsas günahkarlar tərəfindən başına gətirilənlərin qısa xülasəsi olan Müraciətini, kömək üçün onların adlarına ünvanlayıb. Bir müddətdir naəlac qalan iş adamı inanır və ümid edir ki, bu yüksək səlahiyyət sahibləri və ölkə mətbuatının rəhbərləri bu ciddi məsələyə biganə qalmayacaq, onların bu işə müdaxilələri ilə, tezliklə ədalət bərpa olunacaq, haqq öz yerini tapacaq.
Bu yerdə onu da qeyd etməyi lazım bildik ki, iş adamı öz Müraciətində ölkə mətbuatının rəhbərlərindən, vicdanlı və obyektiv jurnalistlərdən dönə-dönə onu da xahiş edir ki, bu məsələni daim diqqətdə saxlasınlar. Medianı, hakimlərin onun vətəndaş hüquqlarını pozmağa yönəlik ədalətsiz Qərar və Qətnamə qəbul etmələri barədə ictimaiyyəti daha ətraflı məlumatlandırmağa çağıran şikayətçinin çətin durumda olduğunu nəzərə alıb, onun araz.az-ın ünvanına da göndərdiyi şikayət xarakterli həmin Müraciətini, nöqtə-vergülunə toxunmadan, aidiyyatı dövlət qurumları rəhbərlərinin və dəyərli oxucularımızın da diqqətinə çatdırırıq:
"AZƏRBAYCAN RESPUBLİKASININ PREZİDENTİ MÖHTƏRƏM İLHAM ƏLİYEV CƏNABLARINA
AZƏRBAYCAN RESPUBLİKASININ BİRİNCİ VİTSE-PREZİDENTİ ÇOX HÖRMƏTLİ MEHRİBAN XANIM ƏLİYEVAYA
AZƏRBAYCAN RESPUBLİKASI
MƏHKƏMƏ-HÜQUQ ŞURASININ SƏDRİ, ƏDLİYYƏ NAZİRİ CƏNAB FİKRƏT MƏMMƏDOVA
ÖLKƏNİN MƏTBUAT ORQANLARININ BAŞ REDAKTORLARINA
Bakı şəhəri, Suraxanı rayonu, Yeni Günəşli qəsəbəsi, “AB” yaşayış massivi, ev, 143, mənzil, 61/62 ünvanında yaşayan Tahirə Səyyaf qızı Mirzəyeva tərəfindən
MÜRACİƏT
Möhtərəm Prezident!
Çox hörmətli Mehriban xanım!
Cənab Sədr!
Hörmətli Baş redaktorlar!
Mənim Sizlərə şikayət xarakterli bu Müraciətim, Bakı Şəhər Nizami Rayon Məhkəməsinin hakimləri Həqiqət Əhmədovanın və Qumru Əliyevanın, eləcə də Nizami Rayon İcra və Probasiya Şöbəsinin icrasçısı Fəxrəddin Şahhüseynovun, bir vətəndaş və iş adamı olaraq, mənə qarşı yönələn və mövcud qanunlarımızın çərçivəsinə sığmayan bəd əməlləri barəsindədir. Vaxtınızı almamaq üçün, konkret olaraq bunları qeyd etmək istəyirəm ki, adlarını çəkdiyim hakimlər və iş icraçısı mənim şikayətim üzrə obyektiv məhkəmə araşdırması aparmadan, qanunsuz və əsassız Qərar və Qətnamə qəbul etməklə, bir iş adamı kimi, məni həddən çox maddi ziyana salıblar. Məhz bu səbəbdən, mən hakimlərdən və icraçıdan şikayətimi ölkə başçısına, Birinci vitse-prezidentə, Məhkəmə - Hüquq Şurasının sədrinə, eləcə də nüfuzlu mətbuat vasitələrinin rəhbərlərinə ünvanlamağı vacib bildim. Çünki bir iddiaçı iş adamı olaraq, mənim ilkin iddiam, eləcə də qarşı tərəfin qarşılıqlı iddiası üzrə məhkəmə işlərinə baxılarkən, həm prosesin gedişi zamanı, həm də Qərar verilib, Qətnamə qəbul edilərkən, bir də iş icraya yönəldilərkən hakimlərlə bərabər, məhkəmə icraçısı da özlərini cavabdeh tərəfin -- “Eldar” Kiçik Müəssisəsinin məni, mənimlə bərabər mənə köməkçi olan oğlum Namiq Mirzə oğlu Mirzəyevi qorxub-cəkinmədən hədələyən, özlərini yuxarıların adamları və "dtx əməkdaşları" kimi qələmə verən bu kiçik müəssisəsinin rəhbərlərini -- iki qardaş olan Zahid və Surac Əkbərovları dəstəkləyib, onların tərəfində olduqlarını açıq-aşkar nümayiş etdirməkdən çəkinmədilər. Beləcə, bir sahibkar olaraq, mənim ilkin iddia üzrə cavabdeh, qarşılıqlı iddia üzrə iddiaçı “Eldar” Kiçik Müəssisəsinə qarşı “maddi ziyan və əldən çıxmış faydanın ödənilməsi” tələbinə dair iddiam təmin edilmədi, üstəlik, ilkin iddia üzrə ödənilmiş dövlət rüsumu belə mənə aid edildi.
Həmin Qərar və Qətnamənin sürətlərini də, şikayət ərizəmə əlavə edir və bildirmək istəyirəm ki, qarşılıqlı iddia tələbi də qismən təmin edilib. Bakı şəhəri 12 saylı notariat kontorunda, icarə verən “Eldar” Kiçik Müəssisəsi ilə mənim aramda 16 avqust 2021-ci il tarixdə bağlanmış və reyestrdə 3M-1751 №-si ilə qeyd edilmiş icarə müqaviləsinə xitam verilib. Bu azmış kimi, 16.09.2021-ci il – 03.10.2021-ci il tarixləri üzrə 68 (altmış səkkiz) manat ödənilməmiş icarə haqqı da məndən tutularaq, “Eldar” Kiçik Müəssisəsinə ödənilməsi qət edilib.
Onu da qeyd edim ki, mənim tərəfimdən “Eldar” Kiçik Müəssisəsinə məxsus əmlakdan istifadəyə yaradılmış maneənin aradan qaldırılması tələbi qismən təmin edilib, bir ədəd xəmir yoğurma aparatı, bir ədəd çörək bişirmə peçi, bir ədəd tefal çayniki, bir ədəd kündə çəkilməsi üçün tərəzi, bir ədəd soyuducu və 15 tay un dolu kisələrin mənim hesabıma “Eldar” Kiçik Müəssisəsinə məxsus icarə obyektindən çıxarılması qət edilib. İddiam qalan hissədə təmin edilməyib. Qarşılıqlı iddia üzrə ödənilmiş dövlət rüsumu ilkin iddia üzrə cavabdeh, qarşılıqlı iddia üzrə iddiaçı “Eldar” Kiçik Müəssisəsinə aid edilib.
Beləcə, qanunlarımızın tələbələri əleyhinə gedərək, iddiaçı olsam da, mənim haqlı tələblərimi nəzərə almayan, 7 aya yaxındır ki, məni halal işimdən və qazancımdan məhrum edən, təkcə məni yox, mənimlə işləyən neçə-neçə vətəndaşı belə ailəsinə çörək və dolanışıq pulu aparmaqdan məhrum edən, hətta mənim iştirakım olmadan, məhkəmə predmeti olan və mənə icarəyə verilən obyektə baxış keçirən, beləcə qeyri-qanuni Qərar və Qətnamə qəbul edən hakim kimi, məhkəmə icraçısı da, möhtərəm Prezidentimiz, Sizin, dövlət başçısı olaraq, sahibkarlara və iş adamlarına olan səmimi münasibətinizin, onlara qarşı yürütdüyünüz siyasətin, sahibkarlara və iş adamlarına dəstək çağırışlarınızın əleyhinə olduqlarını ortaya qoymaqdan çəkinmədilər.
Sahibkarlıq fəaliyyətimə qarşı ciddi maddi və mənəvi zərbəyə çevrilən epizodlar çərçivəsində, Müraciətimdə qeyd etdiklərimi nəzərə alıb, Sizlərdən bir daha dönə-dönə xahiş edirəm ki, Bakı Şəhər Nizami Rayon Məhkəməsinin adlarını çəkdiyim hakimləri və məhkəmə icraçısı barəsində, mövcud qanunlarımızın tələbələri çərçivəsində tədbir görülməsinə ciddi tapşırıqlarınızı verəsiniz! Bu yerdə, həmçinin onu da qeyd edirəm ki, mən həmin məhkəmə Qətnaməsindən Bakı Apellyasiya Məhkəməsinə Apellyasiya Şikayəti də vermişəm. Xahiş edirəm, bu işə Bakı Apellyasiya Məhkəməsində qanun tələbinə uyğun baxılması üçün də, müvafiq göstərişlərinizi verəsiniz!
Edəcəyiniz köməyə görə, Sizlərə, qabaqcadan minnətdarlığımı da çatdırıram!
İMZA: TAHİRƏ MİRZƏYEVA.
Bakı şəhəri, 15 aprel, 2022-ci il".
Şikayətçi adından redaksiyamıza da daxil olan bu Müraciətdə göstərilənlərlə bağlı, jurnalist araşdırması apararkən əldə etdiyimiz dəqiq məlumatlar, eləcə də biznes işində xanım iş adamının ən yaxın köməkçisinin, məhkəmə proseslərində rəsmi nümayəndəsinin -- oğlu Namiq Mirzəyevin bizə dedikləri bir daha sübut etdi ki, doğrudan da, ölkə mətbuatında hakimlərin ədalətsiz qərar və qətnamələr çıxardıqları barədə tez-tez dərc olunan yazılarda verilən məlumatların, demək olar ki, əksəriyyəti düzdür.
Namiq Mirzəyevin bu qəbildən bizə dediklərindən:
-- Ümidimiz hər yerdən kəsildiyindən, nəhayət, Nizami Rayon Məhkəməsinə müraciət etməyi lazım bildik. Ancaq bu da öz müsbət nəticəsini vermədi. Hansısa “görünməz nüfuz sahibi"nin diqtəsi hər iki hakimi -- Həqiqət Əhmədovanı və Qumru Əliyevanı, eləcə də məhkəmə icrasçısı Fəxrəddin Şahhüseynovu məhkəmə və icra proseslərini cavabdehin maraqları çərçivəsində bitirmələrinə gətirib çıxartdı. Dəhşət ondadır ki, bütün bunlardan sonra, həqiqət və ədalət carçıları olacaqlarına vaxtilə and içən ölkə hakimlərinin əksəriyyətinin alınıb-satıldıqları barədə deyilənlər, artıq, bizim üçün də, günümüzün reallığına çevrildi. Çünki bunu, anamla bərabər, mən də öz gözlərimizlə görür və bu biabırçılığa şahidlik edirik. Gördüyümüz bu biabırçılıqlar səhnəsindən sonra, onu da fikirləşirik ki, hakim mantiyası daşıyan, həqiqət və ədalət carçısı olan insan əgər belə qanunsuz biabırçı əməllərə qol qoyursa, onda, artıq dünyanın sonudur.
Hələ bu dediklərim, eləcə də anamın Müraciətində yazılanlar nədir ki?!. Bunlar, ümumiyyətlə, ədalət carçısı kimi məhkəmə hakimləri, onların icra qətnamələrini yerinə yetirən məhkəmə icraçısı, eləcə də icarədar tərəfindən icarəçi kimi başımıza gətirilənlərin nəinki bir hissəsi, hətta, sanki vaxtaşırı baxdığımız bu mövzuda çoxseriyalı bir kinonun adi bir sujetidir. Onsuz da, hakimlərin, eləcə də məhkəmə icraçısının təqsirləri ucbatından, Surac və Zahid Əkbərov qardaşları tərəfindən, anamın və mənim başımıza gətirilənlər, kinolardakı dəhşət və müsibət süjetləritək, heç vaxt unudulası deyil.
Başımıza açılan oyunlarla bağlı, az da olsa, Müraciətdə yazmışıq. Amma, yeri gəlmişkən, onu ətraflı demək istəyirəm ki, Bakı şəhəri, Nizamı rayonu, Məmmədov küçəsi, 160 F ünvanında yerləşən və “Eldar” Kiçik Müəssisəsinə məxsus 304,7 kv.m ümumi sahəli qeyri-yaşayış yerinin 120 kv.m-lik hissəsini, əvvəli 2021-ci ilin avqust ayının 16-sı, sonu isə, 2023-cü ilin oktyabr ayının 16-sı müəyyən edilən və rəsmi şəkildə təsdiqini tapan İcarə Müqaviləsi ilə, çörək və digər un məmulatları istehsal edən sex açmaq üçün, icarəyə götürdük. Elə, həmin vaxtdan, sexin normal şəkildə işini qurmaq üçün, əlimizdən gələni etdik. Tez bir zamanda tam düzəldib, lazımi qiymətli avadanlıq və əşyalarla təmin edərək, çörəkbişirmə sexini işə saldıq və getdikcə işinin yaxşı getməsi üçün yorulmadan çalışdıq. Çox keçmədən istəyimizə çatıb, istehsal etdiyimiz keyfiyyətli çörək və digər un məmulatları üçün alıcılar da topladıq. Nəticədə, müqavilə ilə müəyyən edilən icarə haqqını, üstəlik, işçilərin əmək haqqını verməkdə çətinliyə düşmədik.
Di gəl ki, işimizin belə yaxşı getməsi, çox keçmədən, icarədarı -- “Eldar” Kiçik Müəssisəsi adından bizimlə bağlanan İcarə Müqaviləsini imzalayan Surac Əkbərovun özünü, getdikcə daha çox "həvəsləndirməyə başladı". Bizə dəfələrlə şəriklik təklif etdi. Aramızda buna razılıq olmadı deyə, qorxub-cəkinmədən bizi təhdid edərək, faizə işləməyi tələb etdi. Biz isə, təbii ki, bunu da qəbul edə bilməzdik.
Bir sözlə, heç bir günahımız və qanunsuz hərəkətimiz olmadığı halda, bizi qovub, sexdən çıxarmaq üçün, Surac Əkbərov, qardaşı Zahid Əkbərovla bərabər, yaxşı olmayan çox şey düşündülər. Gördülər ki, istəklərinə çatmaları üçün, düşündükləri heç nə alınmır, 2021-ci ilin oktyabr ayının 3-ü tarixində, “Eldar” Kiçik Müəssisəsinin təmsilçisi kimi, Etibarnamə ilə sexə gəlib, anamdan, bu yerin icarə haqqını 800 manata qaldırdığı barədə, aramızda bağlanacaq yeni İcarə Müqaviləsinə imza atmağı, əks təqdirdə, elə həmin gün buradan çıxmağımızı israrla bizdən tələb etdi. Aramızda mübahisə dolu nə qədər narazılıqlar yaransa da, buna baxmayaraq, Surac Əkbərov, özünü "dtx əməkdaşı" kimi təqdim edən, bizə bu adla hədə-qorxu gəlməkdən çəkinməyən qardaşı Zahid Əkbərovla bərabər, bizi buradan çıxarmağa nail oldular. Elə, həmin gündən indiyədək, sexin qapısı bağlı qalıb.
Sexdən zorla çıxarıldığımız gündən, orada, hər birinin qiyməti 27 manat olan 82 ədəd un kisəsi qaldı. Nə qədər etsək də, qiymətli avadanlıq və əşyalarımız bir yana, sexin qapısını açdırıb, heç olmasa orada qalan və ümumi dəyəri 2214 manat təşkil edən, bir də ki, xarab və zay olma ehtimalı böyük olan həmin un taylarını oradan çıxara bilmədik. Aradan xeyli müddət keçdikdən və yalnız əraziyə baxan Polis Şöbəsinə müraciət etdikdən sonra, Əkbərov qardaşları həmin un taylarının qaytarılmasına razılıq verdilər. Bu zaman, aradan xeyli müddət keçdiyinə və istifadə müddəti bitdiyinə görə, artıq, unun xarab olduğu hamıya məlum oldu.
Məcburiyyətdən, rəhbəri olaraq sexi işlədən anamın adıyla, bizə dəyən hərtərəfli maddi ziyanı günahkarın -- "Eldar" Kiçik Müəssisəsi rəhbərinin ödəməsi iddiası ilə, Nizami Rayon Məhkəməsinə İddia Ərizəsi verib, hakimlərinin bu barədə Qərar və Qətnamə çıxarmalarını xahiş etdik. Onu da qeyd edim ki, İcarə Müqaviləsində göstərilən vaxtda, cavabdehin təqsiri ucbatından, lazımi qiymətli avadanlıq və əşyalarla təmin etdiyimiz sexin qanunsuz bağlı qalması, nəticədə, indiyədək iş adamı olaraq, anamın fəaliyyəti dayandığına və hərtərəfli ziyana düşüb, gəlir əldə edə bilmədiyinə, eləcə də bağlı yerdə qalaraq, yararsız vəziyyətə düşən 82 ədəd un tayına görə, bizə dəymiş ziyan, eləcə də məhkəməyə müraciət zamanı ödədiyimiz rüsum... üst-üstə 36500 manat təşkil etdiyi üçün, bu məbləğin cavabdeh tərəfindən anama ödənilməsini nəzərdə tutduq.
Bu barədə xəbəri eşidən Əkbərov qardaşları, bundan sonra, amansız düşmən kimi, üstümüzə, o vaxtdan indiyədək, sanki "səlib yürüşünə çıxıblar". Qardaşlar bizdən qişas almaq üçün, hər cür iyrənc vasitəyə əl atıblar. Elə, istədiklərini ediblər də! Hətta qarşılıqlı İddia Ərizəsi verib, bizə acı günlər yaşadıblar. Onlar bizə açıq-aşkar onu da dəfələrlə deməkdən çəkinməyiblər ki, nə olursa-olsun, İddia Ərizəsində göstərdiyimiz maddi ziyan miqdarında -- 30 mindən çox pul xərcləyib, bizim başımıza oyun açacaqlar. Elə, dedikləri kimi də edib, istədiklərini etməyə nail oldular. Hətta ədalət və həqiqət carçıları olan hakimləri, eləcə də məhkəmə icraçısını da, hansı yollasa ələ ala bildilər. Dəhşət ondadır ki, onlar bu işi o yerə çatdıra bildilər ki, nə qədər etsək də, hakim sexin normal vəziyyətdə olmasını və işinin yaxşı getməsini özündə əks etdirən və redaksiyanıza da təqdim etdiyim video-görüntüləri və foto-faktları belə, əsas fakt və inkaredilməz dəlil kimi bizdən qəbul edib, işin içinə qoymadı. Bir sözlə, hakim və məhkəmə icraçısını bizə qarşı qoymağa, hətta məhkəmə proseslərində və obyektə məhkəmə baxışlarında bizdən xəbərsiz öz istəklərinə uyğun Qətnamə çıxarılmasına, protokollar və digər sənədlər tərtib edilməsinə də nail olan Əkbərov qardaşları, həyata keçirdikləri iyrənc vasitələrlə -- məhkəmə proseslərinin belə ciddi hüquq pozuntularıyla aparılması, qanunlara məhəl qoyulmaması və ədalətin bu dərəcədə tapdalanması ilə, bizi dərindən məyus etdilər.
Əlbəttə, bu qanunsuz və ədalətsiz işin arxasında şəxsi marağın dayanması da şəksizdir, yoxsa məhkəmə hakimləri və məhkəmə icraçısı arxayınlıqla bu miqyasda qanunsuzluqlara rəvac verməzdi. Çünki onlar da açıq-aydın görürdülər ki, qarşı tərəf milli ənənə, biznes əxlaqı, vicdan və ədalət anlayışlarını bir kənara qoyaraq, bizim yaratdığımız sexin fəaliyyətini iflic etmək üçün, bütün resursları işə salıb. Anam öz Müraciətində də, bu məqama daha çox diqqət çəkməyi yuxarılarda oturanların hamısından xahiş edib".
Bəli, şikayətçinin yazdıqlarından və rəsmi nümayəndəsinin dediklərindən də məlum olur ki, baş verən bu olaylar zamanı ciddi zərbə alıb, külli miqdarda ziyana düşən, hər şeyini itirən də iş adamı olub. Ortada qazananlar isə, ədaləti və haqqı tapdalayan günahkarlar, bir də onlara tərəfdar olmaqdan çəkinməyərək, haqsız yerə ədalətsiz Qərar və Qətnamə çıxaran, protokollar tərtib edən hakimlər və məhkəmə icraçısıdır. Bu məhkəmə proseslərinin, hansısa “nufuz sahibi gizli qüvvə”nin əliylə günahkar tərəfin xeyrinə yönləndirilməsi, onun bu "səviyyədən" müdafiəsi nəticəsində “qalib gəlməs”i, dəyərli oxucularımız kimi, ictimaiyyətin digər nümayəndələrini də düşündürməyə bilməz. Elə, buna görə, eləcə də qardaşların və onları haqsız yerə müdafiə etməkdən çəkinməyən hakimlərin və məhkəmə icraçısının iş adamına qarşı qanunsuz hərəkətlərindən bəhs edən, bir çox həqiqətləri ortaya qoyan, lakin çox təəssüf ki, məhkəmə proseslərində əhəmiyyət verilməyən sübut dolu faktlar və dəlillər, video-görüntülər, foto-faktlar əlimizdə bol olduğundan, bu mövzu ətrafında baş verə biləcək hadisələri, araz.az xəbər portalının əməkdaşları olaraq, daim diqqətdə saxlayacağıq. Yazıda qeyd olunanlala bağlı, media haqqında qanunların tələblərinə uyğun olaraq, qarşı tərəfin mövqeyini işıqlandırmağa hazır olduğumuzu da, öncədən bildiririk.
Məhi ELSEVƏR,
Səməndər QURBANOV,
araz.az xəbər portalının xüsusi müxbirləri.
REDAKSİYADAN:
araz.az-ın 23.04.2022-ci il tarixində və yeniləyərək, təkrarən indi də dərc etdiyi bu yazıda adlarını günahkar kimi hallandırdığımız “Eldar” Kiçik Müəssisəsinin rəhbərləri -- iki qardaş olan Zahid və Surac Əkbərovlar da, xanım iş adamının, tamamilə onları dəstəkləyib, onların tərəfində olduqlarını açıq-aşkar nümayiş etdirməkdən çəkinməyən hakimlərin çıxardıqları Qərar və Qətnamədən apellyasiya şikayəti verdiyini eşitdikdən dərhal sonra, yenidən hərəkətə keçiblər. Daha doğrusu, gülüş doğuran bir qənaətə gəliblər. Yəni, əldə etdiyimiz məlumata görə, Əkbərov qardaşları da, hakimlərin "ağına-bozuna baxmadan" tamamilə onların xeyrinə çıxardıqları bu Qərar və Qətnamə ilə razılaşmadıqlarını bildirərək, Apellyasiya Məhkəməsinə üz tutublar. Gülməli olduğu qədər, həm də maraqlıdır: Axı, bu o demək deyilmi ki, doğrudan da, günahkarlar bu addımı atmaqla indidən etiraf edirlər ki, bəli, hakımlər onların xeyrinə işləməkdə düzgün etməyiblər. araz.az
