İngiltərə Premyer Liqasının 36-cı turunda “Mançester Siti” “Vulverhempton”u qəbul edib.
Kriminal.Az xəbər verir ki, gözlənildiyi kimi oyuna fəal başlayan meydan sahibləri rəqibin müqavimətini 12-ci dəqiqədə qırıblar. Erlinq Holand dəqiq oynayıb - 1:0. Qonaqlar özlərinə gəlməmiş, daha bir zərbə alıblar. 35-ci dəqiqədə norveçli hücumçu E.Holand dublunu rəsmiləşdirib - 2:0.
Qonaqlar fərqi azaltmaq istəyərkən, daha bir zərbə alıblar. E.Holand ilk hissənin əsas vaxtına əlavə olunmuş 3-cü dəqiqəsində het-trik edib - 3:0. Fasilədən sonra toparlanan “Vulverhempton” futbolçuları fərqi azaldıblar. Hi-Çan Huanq 53-cü dəqiqədə dəqiq oynayıb - 1:3. Amma qonaqların sevinci cəmi bir dəqiqə çəkib. E.Holand 4-cü dəfə rəqibi meydanın mərkəzinə dəvət edib - 4:1. Görüşdə son nöqtəni isə 85-ci dəqiqədə Xulian Alvarez qoyub - 5:1.
Qeyd edək ki, bu qələbə ilə xallarının sayını 82-yə yüksəldən “Mançester Siti” lider “Arsenal”dan yalnız bir xal geri qalır. “Vulverhempton” 46 xalla 11-cidir.
