Beynəlxalq Avtomobil Federasiyasının (FİA) prezidenti Məhəmməd bin Sülayem "Formula-1" mövsümündə Qran-pri yarışlarının sayının azaldılması tərəfdarı olduğunu bildirib.
Kriminal.Az xəbər verir ki, bu barədə "Le Figaro" nəşri məlumat yayıb.
"İldə 24 Qran-pri çoxdur. Mən bunu daha əvvəl də demişdim və dərhal bir çox media tərəfindən tənqid olundum. Bununla belə, mövsümdə 20 Qran-pri kifayətdir.
Bununla belə, il ərzində Qran-pri yarışlarının sayının müəyyən edilməsi FİA-nın məsuliyyəti daxilində deyil. "Formula-1"in yeni bazarlara açılması və yeni ölkələrdə yarışlar təşkil etməsi yaxşı haldır", - deyə bin Sülayem qeyd edib.
O, yarış iştirakçıları arasında Çin komandasını görmək istədiyini bildirib. Bin Sülayemin sözlərinə görə, o, start şəbəkəsinin genişləndirilməsi üzərində işləməyə davam etməyi planlaşdırır.
Xatırladaq ki, 2026-cı ildən etibarən "Formula-1"də 11-ci komanda - "Cadillac" iştirak edəcək.
