Məşhur müğənni Aleyna Tilkinin şəxsi məlumatlarını ələ keçirərək, onları yaymaqla hədələyən İbrahim Y.-nin məhkəməsi olub. Tilki ailəsinin assistenti şahid qismində ifadə verib.
Kriminal.Az-ın verdiyi məlumata görə, bu barədə "Haber Global" xəbər yayıb.
Asistentin sözlərinə görə, təqsirləndirilən şəxs göndərdiyi mesajlarda Aleyna Tilkinin görüntülərinin və şəxsi məlumatlarının olduğunu bildirib.
"Şirkət e-maillərinə baxdığım zaman "şəxsi məlumatlarınız, nömrələriniz əlimdədir və yayılacaq, mənə müraciət edin" mesajını gördüm. Bu və buna bənzər mesajları gördükdə silib bloklayırıq. Göndərdiyi mesajlarda şəxsi məlumatlara dair heç bir məlumat yox idi. Lakin "Instagram"dan da göndərilən eyni məzmunlu mesajda Tilkinin 16-17 yaşlarına aid fotosu və şəxsi məlumatları var idi", - deyə o bildirib.
Məhkəmədə ittihamları rədd edən təqsirləndirilən şəxs bunları deyib:
"Aleyna Tilkinin şəxsi məlumatlarının oğurlandığını öyrəndim. Öyrəndikdən sonra kömək etmək məqsədilə əvvəlcə ona mesaj göndərdim, məlumatlarının oğurlandığını dedim. Daha sonra atasına və assistentinə ismarış göndərdim. Məqsədim kömək etmək idi".
Məhkəmə işi Prokurorluğa göndərərək onların rəyinin hazırlamasını istəyib. Məhkəmədə qərar çıxarılması gözlənilir.
Qeyd edək ki, "şəxsi məlumatları qanunsuz olaraq ələ keçirmək və yaymaq"da ittiham olunan İbrahim Y. 4 ilə qədər həbsə məhkum ola bilər.
