2023-cü ilin oktyabrında Cəlilabadda Mirxaqani Əhmədovu bıçaqlayaraq öldürən şəxslərə hökm oxunub.
Oxu.Az "Qafqazinfo"ya istinadən xəbər verir ki, hadisəni törədən 1998-ci il təvəllüdlü Böyükxan Elçin oğlu Muradlı 10 il 6 ay, onun qohumu və dostu olan Rəşid 10 il 6 ay, hadisənin digər iştirakçısı Hüseyn isə 9 il həbs cəzası alıblar.
Lənkəran Ağır Cinayətlər Məhkəməsində keçirilən prosesdə bildirilib ki, hadisə qisas zəminində baş verib. Belə ki, Mirxaqani Əhmədov bir neçə il əvvəl münaqişə zəminində Böyükxanın atası, rayonda "Məşədi Elçin" adı ilə tanınan şəxslə dalaşaraq ona xəsarət yetirib. Həmin vaxt yeniyetmə olan Böyükxan Mirxaqaniyə qisas hissi bəsləyib və onu öldürməyi planlaşdırıb.
Bu məqsədlə o, dostları ilə plan qurub. Həmçinin Böyükxan cinayəti törətməzdən əvvəl sosial şəbəkədə atasının qisasını alacağı ilə bağlı status paylaşıb.
"BAXA777" adlı açıq hesabında oktyabrın 19-da belə bir post paylaşıb:
"Çox yaşa atam. Allah ömrünə ömür qatsın. Cəlilabadın əziyyətini dərəcəsində çəkən yeganə kişilərdənsən. Şərəfsizlər, qeyrətsizlər qədrini bilmədilər. Vaxt o vaxt olacaq ki, ayağına gələn həmin şəxsləri (təhqiramiz ifadə) elətdirəcəyəm".
O, oktyabrın 24-də Bakıdan Cəlilabada gedib və dostlarının köməyi ilə Mirxaqaninin olduğu yeri izləyib. Mirxaqani Cəlilabad şəhərində aptekdən çıxarkən Böyükxan ona hücum edərək bıçaqla qətlə yetirib.
