Siciliya sahillərində yaxtanın qəzaya uğraması nəticəsində itkin düşən britaniyalı multimilyonçu Maykl Linç İsrailin "Mossad" kəşfiyyat xidməti ilə əlaqəli olub.
Bu barədə Kriminal.Az "Nova" agentliyinə istinadən xəbər verir.
Xarici KİV-in mənbəsinin məlumatına görə, Linçin sahibi olduğu kompüter təhlükəsizliyi təminatı ilə məşğul olan "Darktrace" şirkəti İsrail xüsusi xidmət orqanları ilə əməkdaşlıq edib. Onlar öz fəaliyyətlərində, xüsusən də Fələstin HƏMAS hərəkatının liderlərinin yerinin müəyyən edilməsində şirkət tərəfindən hazırlanmış sistemlərdən istifadə ediblər.
Bundan əlavə, məlumdur ki, 2023-cü ilin martında "Darktrace"də ABŞ-nin aparıcı dövlət qurumlarını, o cümlədən Pentaqonu kiberhücumlardan qorumaq üçün İT bölməsi yaradılıb. "Darktrace"in əsas layihəsi süni intellekt (AI) texnologiyasına əsaslanan sistem olub.
Xatırladaq ki, texnologiyalar sahəsində 59 yaşlı britaniyalı sahibkar Maykl Linçin itkin düşdüyü ilə bağlı avqustun 19-da xəbər verilib. Məlumatlara görə, Linç yaxtanın Siciliya sahillərində qəzaya uğramasından sonra itkin düşüb. İtaliyanın sahil mühafizəsinin sözlərinə görə, içərisində 22 nəfərin olduğu, 56 metr uzunluğundakı "Bayesian" gəmisi Portiçello limanı yaxınlığında lövbər salıbmış.
Səhər tezdən Linç iş yoldaşları üçün səyahət təşkil edib, lakin şiddətli fırtına zamanı yaxta batıb. 15 nəfər gəmidən xilas ola bilib ki, onların arasında yaxtanın sahibi, Linçin həyat yoldaşı Ancela Bakares, həmçinin onların bir yaşlı qızı da olub. Ehtimallara görə, itkin düşənlər, çox güman ki, gəminin kabinələrində olublar və içəridə ilişib qalıblar.
