BMT-nin İqlim Dəyişmələri üzrə Çərçivə Konvensiyasının Tərəflər Konfransının 29-cu sessiyası (COP29) çərçivəsində "Dünya dinləri yaşıl planet uğrunda" şüarı altında Bakıda keçirilən Dini Liderlərin Qlobal Sammiti yekunlaşıb.
"Report" xəbər verir ki, sammitdə dini liderlər "Dünya Dinləri Yaşıl Planet uğrunda" mövzusunda və iqlim dəyişikliyinin yaratdığı problemlər haqqında çıxışlar ediblər.
Yekun nitqində Qafqaz Müsəlmanları İdarəsinin sədri Allahşükür Paşazadə iqlim problemləri ilə bağlı müzakirələr və təkliflərə görə sammit iştirakçılarına təşəkkür edib. O qeyd edib ki, dini liderlərin Bakıda toplanmağının məqsədi siyasətçilərin də diqqətini iqlim problemlərinə cəlb etməkdir: "COP29-un Azərbaycanda keçirilməsi qürurverici və çox əhəmiyyətlidir. Qlobal sammit öz sözünü deyəcək".
Dini Qurumlarla İş üzrə Dövlət Komitəsinin sədri Ramin Məmmədov isə vurğulayıb ki, COP29 kimi mötəbər tədbirə ev sahibliyi edən Azərbaycan qlobal problemlərin həllinə xüsusi diqqət göstərdiyini bir daha sübut etdi:
"Sammitdə səsləndirilən fikirləri ümumiləşdirsək, belə qənaətə gəlmək olar ki, sammit iştirakçıları dünya dövlətlərinə iki istiqamətdə mesaj veriblər. Birinci mesaj dünya liderlərinə yönəlib. Onların iqlim problemləri ilə bağlı fəaliyyətdə düzgün idarəçiliyinə diqqət çəkilib. İkinci mesaj isə bütün insanlara yönəlmiş ismarışdır. Hər kəsin fərdi şəkildə iqlim dəyişikliyi ilə mübarizəyə qoşulması önəmli hesab edildi. Düşünürəm ki, Qlobal Sammit öz məqsədlərinə nail olacaq".
Ekologiya və təbii sərvətlər nazirinin müavini Vüqar Kərimov da iqlim dəyişikliyinin dini liderlər platformasında müzakirəsinin vacib olduğunu deyib. O qeyd edib ki, ətraf mühitin qorunması hazırkı dönəmdə çox vacib məsələdir: "İqlim dəyişmələri son 50-100 ildə çox aktual olsa da, əvvəlki dövrlərdə də bu problemlər mövcud olub. Bununla mübarizə isə insanlığın başlıca məqsədlərindən biridir".
Birləşmiş Millətlər Təşkilatının Ətraf Mühit Proqramının (UNEP) Yer Kürəsi Naminə İnanc Koalisiyasının təsisçisi və direktoru Iyad Abu Moghli sammit iştirakçılarına çağırış edərək iqlim dəyişikliyi və ekoloji deqradasiyaya qarşı mübarizədə gücləri səfərbər etməyə səsləyib:
"COP29-da 40-dan çox sessiya keçiriləcək. İqlim dəyişikliyi ilə mübarizəyə mənəvi, əxlaqi, maliyyə resursları sərf edilməlidir ki, problemin həllinə nail olaq. Dini liderlərin bununla bağlı rolu çox böyükdür. İnsanları inandırmalı, hər kəsə, hətta təcrid edilmiş icmalara da səsimizi çatdırmalıyıq. Gəlin, sağlam, təhlükəsiz mühitdə birlikdə yaşayaq".
Müsəlman Ağsaqqalları Şurasının sədri Məhəmməd Əbdülsalam qeyd edib ki, sammitin gündəmi çox geniş olub:
"Mən inanıram ki, dini liderlər qlobal problemləri birgə həll edə bilərlər. Bu istiqamətdə qəbul olunan yekun sənədin məqsədlərinə nail olacağını düşünürəm".
BMT-nin İqlim Dəyişmələri üzrə Çərçivə Konvensiyasının Tərəflər Konfransının 29-cu sessiyası (COP29) çərçivəsində "Dünya dinləri yaşıl planet uğrunda" şüarı altında keçirilən Dini Liderlərin Qlobal Sammitinin yekun sənədi - Bakı Bəyannaməsi qəbul edilib.
"Report" xəbər verir ki, bəyanatda deyilir:
"Qlobal iqlim dəyişikliyi, biomüxtəlifliyin itirilməsi, səhralaşma, quraqlıq, torpaqların deqradasiyası, meşə yanğınları, ətraf mühitin çirklənməsi, ərzaq təhlükəsizliyi və su qıtlığından öz dərin narahatlıqlarını bildirərək, bu problemlərin səbəblərini müzakirə etmək üçün birgə səylərin sürətləndirilməsinin, sağlam ekosistemlərin yaradılması və təkmilləşdirilməsinin vacibliyini qeyd edərək;
2023-cü ildə Birləşmiş Ərəb Əmirliklərinin Əbu Dabi şəhərində keçirilən COP28 Dini Liderlərin Qlobal Sammitində imzalanmış "COP28 Dinlərarası Bəyanatını alqışlayaraq;
Zati-Müqəddəsləri Papa Fransisk və Əl-Əzhərin Baş İmamı Zati-Həzrətləri Şeyx Əhməd Əl-Tayyib tərəfindən 4 fevral 2019-cu il tarixində Əbu-Dabidə imzalanmış "İnsan Qardaşlığı, dünyada sülh və birgəyaşayış" adlı Sənədin dinlərarası əməkdaşlığın inkişafı üçün əhəmiyyətini qeyd edərək,
COP29 çərçivəsində Dini Liderlərin Qlobal Sammitinə himayədarlığına, göstərdiyi özəl diqqətə və tədbirin ünvanına dərin məzmunlu müraciətinə görə Azərbaycan Prezidenti İlham Əliyevə minnətdarlığını bildirərək və COP29-un işində uğurlar arzulayaraq;
Qarşılıqlı etimad, birlik, harmoniya və iqlim dəyişikliyi ilə bağlı maarifləndirmə işində sivilizasiyalararası və dinlərarası münasibətlərin, milli-mədəni dəyərlərin və biliklərin, o cümlədən, multikulturalizm ənənələrinin gücləndirilməsinin vacibliyini vurğulayaraq;
Azərbaycanın iqlim böhranı ilə mübarizədə və ekoloji problemlərin həllində liderlik etməsini və bu kontekstdə 2024-cü ilin "Yaşıl Dünya naminə Həmrəylik İli"nin elan edilməsini alqışlayaraq;
Azərbaycan Prezidentinin təşəbbüsü ilə həyata keçirilən "Bakı Prosesi"nin VƏ sivilizasiyalararası dialoqun inkişafına yönəlmiş Qlobal Mədəniyyətlərarası Dialoq forumlarının, eləcə də Bakı Beynəlxalq Humanitar Forumlarının, Dünya Dini Liderlərinin Zirvə toplantılarının, eləcə də BMT Sivilizasiyalar Alyansının 7-ci Qlobal Forumunun və Bakı Beynəlxalq "Dinlərarası və mədəniyyətlərarası əməkdaşlıq" Konfransının əhəmiyyətini vurğulayaraq;
Digər mühüm dini forumların, o cümlədən, Dünya və Ənənəvi Dinlər Liderlərinin Astana Qurultaylarının, Bəhreyn Dialoq Forumunun, G20 Dinlərarası Forumlarının, İqlim Dəyişikliyi üzrə daha əvvəl COP çərçivəsində keçirilmiş Dini Liderlərin Qlobal Sammitinin və "Səudiyyə Media Forum"unun əhəmiyyətini qeyd edərək bunların qarşılıqlı etimada, birlik və harmoniyaya töhfələrini vurğulayaraq;
Dünyanın müxtəlif regionlarından olan xristian, müsəlman, yəhudi, hinduist, buddist və digər din və inanc nümayəndələrinin müasir dünyanı təhdid edən problemlərlə bağlı vahid və yekdil mövqe bildirmək üçün bir araya gəldikləri buna bənzər dinlərarası tədbirlərin mütəmadi keçirilməsinin zəruriliyini vurğulayaraq;
Silahlı münaqişələrin, terror aktlarının, dini və etnik zəmində baş verən zorakılıqların insan tələfatı ilə yanaşı ekoloji fəlakətlərlə, habelə mədəni və dini irsin talan və məhv edilməsi ilə müşayiət olunmasından, ekosid və urbisid aktlarının və onların ağır nəticələrindən, habelə iqlim dəyişikliyi ilə mübarizəyə etdiyi mənfi təsirlərdən dərin narahatlıq ifadə edərək;
Dövlətlərə, beynəlxalq, regional, dini, ictimai təşkilatlara və dini liderlərə müraciət edərək:
- iqlim dəyişikliyi ilə mübarizəyə həsr olunmuş ictimai müzakirələrdə fəal iştirak etməyə, daha yaşıl gələcəyə baxışı reallaşdırmaq üçün qlobal dəstəyi gücləndirməyə;
- insan həyatının və təbiətin müqəddəsliyini tanımağa, bütün canlıları və təbiəti qorumaq dəyərlərinə hörmət etməyə, ekoloji bərabərlik və ədaləti müdafiə etməyə;
- qlobal iqlim böhranının aradan qaldırılması və təbiətin qorunması üçün dünyada istilik hərarətinin artımı həddinin 1,5 dərəcədə saxlanılması prosesində daha fəal rol oynamağa;
- ekoloji problemlərin həllinin və təbii ehtiyatların idarə edilməsinin təkmilləşdirilməsinə töhfə verən süni intellekt texnologiyalarından düşünülmüş şəkildə istifadə olunmasını tövsiyə etməyə;
- süni intellektin məsuliyyətsiz istifadəsinin mümkün fəsadları barədə xəbərdarlıq edərək, müasir texnologiyaların istifadəsi zamanı müşayiət oluna biləcək risklərin nəzərə alınmasına və süni intellektin nəzarətsiz tətbiq edilməsinin ekoloji böhranları həll etmək əvəzinə daha da artmasına səbəb olmaması üçün alimlər, qanunvericilər, siyasət xadimləri, dini liderlər, beynəlxalq və ictimai təşkilatlar arasında əməkdaşlığı təşviq etməyə;
- Paris İqlim Sazişinin uzunmüddətli məqsədlərinin həyata keçirilməsinə və irəliləməsinə dəstək vermək üçün birgə çalışmağa;
- müxtəlif din və əqidə nümayəndələrinin, siyasətçilərin, akademik dairələrin, din alimlərinin, qadınların, gənclərin, yerli əhalinin və icmaların, vətəndaş cəmiyyətinin, İşgüzar dairələrin və digər maraqlı tərəflərin birgə müzakirələrə cəlb edilməsinə xüsusi diqqət yetirməklə iqlim dəyişikliyi ilə mübarizədə inklüziv prosesi təşviq etməyə;
- ərzaq təhlükəsizliyinin təmin olunmamasına səbəb olan, təbii su anbarlarını və hövzələrini məhv edən, torpağı deqradasiyaya məruz qoyan, iqlim dəyişikliyi ilə mübarizədə kollektiv səylərə mane olan silahlı münaqişələrə, zorakılıq, kütləvi qırğın silahlanması, ekosid və urbisid aktlarına son qoymaq üçün çağırış və fəal iş aparmaqla qlobal sülh gündəliyinə töhfə verməyə;
- terrorçu və ekstremist qruplaşmaların öz məkrli niyyətləri naminə dinlərin adından sui-istifadə etməsi cəhdlərinə qarşı birgə və yekdil mövqedən çıxış edilməsinə;
- media və informasiya texnologiyaları vasitəsi ilə zorakılığa təhrik edən zərərli ideologiyaların və nifrət çağırışlarının qarşısının alınmasında əməkdaşlığın artırılmasına;
- dini rəmzlərə, müqəddəsliklərə və atributlara qarşı vandalizm aktlarını pisləməyə, demokratiya və söz azadlığı pərdəsi altında bu kimi əməllərə bəraət qazandırmağa yol verməməyə;
- gənclərin ksenofobiya və ayrı-seçkiliyə qarşı mübarizədə daha fəal iştirakı məqsədilə bərabər vətəndaşlıq, insan qardaşlığı, habelə iqlim dəyişikliyi ilə mübarizə və ətraf mühitin qorunması mövzusunda maarifləndirilməsini və bu proseslərdə Kütləvi İnformasiya Vasitələrinin rolunu təşviq etməyə;
- təmiz, sağlam, sabit və dayanıqlı cəmiyyətlərdə insan hüquqlarının təmin edilməsinə xüsusi önəm verməyə;
- iqlim dəyişikliyi ilə mübarizədə onların xüsusi əhəmiyyətini vurğulayan təbii su anbarlarının və hövzələrinin məsuliyyətsiz və həddindən artıq istifadəsini pisləməyə;
iqlim dəyişikliyi ilə bağlı problemlərin həllində dinlərin və inancların potensiallarından daha səmərəli istifadə etməyə;
- dini, mədəni və etnik müxtəlifliyin qorunmasına, bunlara hörmət edilməsinə dəstək verməyə, dünya dinlərinin mənəvi-əxlaqi dəyərlərinə əsaslanan ekoetikanı təbliğ etməyə çağırırlar".
Qeyd edək ki, COP29 çərçivəsində Dini Liderlərin Qlobal Sammiti noyabrın 5-6-da Azərbaycan Prezidenti İlham Əliyevin himayəsi ilə Bakıda keçirilib. "Dünya dinləri yaşıl planet naminə" şüarı altında keçirilən Sammit Ekologiya və Təbii Sərvətlər Nazirliyi, Dini Qurumlarla İş üzrə Dövlət Komitəsi, Müsəlman Ağsaqqalları Şurası, BMT Ətraf Mühit Proqramı (UNEP) və Qafqaz Müsəlmanları İdarəsinin birgə təşkilatçılığı ilə baş tutub. Tədbirdə dünyanın 300-ə yaxın tanınmış dini liderləri, xarici dövlətlərin nümayəndələri, BMT-nin yüksək vəzifəli şəxsləri, beynəlxalq təşkilatların rəhbərləri, elm və din xadimləri iştirak ediblər.
Dini Liderlərin Qlobal Sammiti yekunlaşıb
BMT-nin İqlim Dəyişmələri üzrə Çərçivə Konvensiyasının Tərəflər Konfransının 29-cu sessiyası (COP29) çərçivəsində "Dünya dinləri yaşıl planet uğrunda" şüarı altında keçirilən Dini Liderlərin Qlobal Sammitinin ikinci günü başlayıb.
"Report" xəbər verir ki, sammit işini plenar iclasla davam etdirir.
Tədbirin sonunda COP29 çərçivəsində "Dünya dinləri yaşıl planet uğrunda" mövzusunda keçirilən Dünya Dini Liderlərinin Qlobal Bakı Sammitinin yekun sənədi - Bakı Bəyannaməsi və dünya dini liderlərinin COP29 Bakı iştirakçılarına müraciəti qəbul ediləcək.
Sammit iştirakçıları, həmçinin Azərbaycan Prezidenti İlham Əliyevə təşəkkür məktubu ünvanlayacaqlar.
Daha sonra mətbuat konfransı ilə ikigünlük Sammit yekunlaşacaq.
Qeyd edək ki, ikigünlük sammitdə 30-a yaxın dünya və ənənəvi dinlərin liderləri, nüfuzlu dini mərkəzlərin başçıları - patriarxlar, Vatikan və Əl-Əzhər rəsmiləri, müxtəlif qitələri, konfessiyaları və dünya miqyasında tanınmış görkəmli din və ictimaiyyət xadimləri, ümumilikdə 55 ölkəni və 30 beynəlxalq təşkilatı təmsil edən dövlət, elm və din xadimləri, həmçinin media subyektlərinin nümayəndələri iştirak edir.
Forum sonrası Sammit iştirakçılarının noyabrın 7-də işğaldan azad olunmuş ərazilərə səfər etməsi və reallıqlarla bilavasitə tanış olmaları planlaşdırılır.
Məlumat üçün bildirək ki, Sammit Ekologiya və Təbii Sərvətlər Nazirliyi, Dini Qurumlarla İş üzrə Dövlət Komitəsi, Müsəlman Ağsaqqalları Şurası, BMT Ətraf Mühit Proqramı (UNEP) və Qafqaz Müsəlmanları İdarəsinin birgə təşkilatçılığı ilə baş tutur.
