Bazar günü Bakı xüsusi bir qonağı - əfsanəvi Britaniya supermodeli Naomi Kempbelli qəbul edib. Məşhur modelin səfəri "Formula-1" Azərbaycan Qran-prisinin son günündə iştirakı ilə bağldır.
Kriminal.Az-ın məlumatına görə, Naomi 15.9 milyondan çox izləyicisi olan "Instagram" səhifəsində Bakıya səfəri ilə bağlı təəssüratlarını bölüşüb.
O, Azərbaycan Prezidenti İlham Əliyevə, onun köməkçisi Anar Ələkbərova, gənclər və idman naziri Fərid Qayıbova, həmçinin "Formula-1" rəhbərliyinə səmimi qəbula görə təşəkkürünü bildirib.
Dövlət başçısı ilə görüşü zamanı Naomi Kempbell Azərbaycanda moda sənayesinin inkişafına töhfə vermək və yerli dizaynerlərə dəstək göstərmək istəyini ifadə edib.
Naomiyə xüsusi təsir bağışlayan onun yaxın dostu, görkəmli memar Zaha Hadid tərəfindən layihələndirilmiş Heydər Əliyev Mərkəzi olub. Kampbell mərkəzin binasını "ilhamverici" adlandırıb və onun unikal memarlığını qeyd edib.
Səfərin kulminasiyası supermodelin Azərbaycan Qran-prisinin qaliblərinin mükafatlandırma mərasimində iştirakı olub. Naomi Kempbell Azərbaycan paytaxtına səfərini gözəl adlandırıb və Azərbaycan Qran-prisinin bitdiyini bildirən finişdəki damalı bayrağı qaldırmağın onun üçün böyük şərəf olduğunu vurğulayıb.
